ساعة صبحية

صباحكم سكر

امبارح وانا فى بلد التويتر شفت تويتة عن الكتابة، بتقول فى مجملها أن الكاتب الحقيقي بيكتب وبس، لكن الكاتب الفالصو بيقعد يتكلم كلام منمق عن الحب والأدب، اقتباسات من اى مكان، بيشتكى دايما من ال writer blocks

يعني بيعمل أى حاجة إلا أنه يكتب حقيقي.

لا أخفيكم سرا حسيت ان التويتة دى قلم نزل على وشي، انه انا فى كتير من الأحيان بعمل كدة ، الأنسان لازم يبقى واضح مع نفسه عشان يعرف غلطه فين ويعدل طريقه، انا بقعد اشتكي من انى معنديش افكار وبتاع، بس لو قعدت شوية وركزت بجيب أفكار.

كنت محتاجة حاجة زى كدة عشان اتحرك بطريقة صح، ومقعدش اشكي حظى، ولا انى وقتى مش مكفي-رغم أن دة بيكون حقيقي بجد والله – ولا حتى ادبس أطفال في الموضوع وهما براه جدا أصلا

الموضوع كله محتاج صبر وجهد، مش مجرد إلهام ووحي هينزل كدة وخلاص، ولا سحر بيخلى الواحد يكتب كتابات مبهرة.

انا حقيقي بحب الكتابة جدا جدا من صغري، مش كلام وخلاص، واتمنيت فى يوم من الأيام انى اكون روائية وكاتبة، ونسيت الحلم دة فترة ورجعتله تانى، بس عايزة أكون كاتبه حقيقية بجد، مش كاتبة فالصو.

صباحكم زى الورد ^_^

الإعلان