صباحكم فرحة وبركة
عارفين أن ساعة صبحية استثنائية، لأنى بحب أنوعها ما بين لهجتي العامية وما بين الفصحى، المرة دي حابة أكتبها بالعامية الحقيقة.
أخدت القرار للمرة التانية بأنى أمسح الفيس بوك لمدة شهر،لأنى للأسف فضل معايا موضوع انى أقفله بالتطبيقات لأن ساعات التطبيقات مش بتشغل كويس، فالأحسن انى أمسحة خالص ولو في شيء ضرورى جدا بدخل أخده وأقفل فورا من اللاب توب.
أنجزت في فترة أسبوع كورس كامل، صحيح صغير بس أنجزته بسرعة جدا، كمان بدأت أنظم وقتى أكتر.
فيس بوك بالنسبالى كان هو وقتي كله حرفيا في فترة من فترات عمرى، وحاسة أن الوقت دة أتسرق منى، ومحدش ضيعه غيري، خرفيا درجة أدمان، وللأسف مش لوحدى.
القترة اللى راحت على فيس بوك كان ممكن أستفيد بيها في حاجات كتير جدا، بس خلاص الندم مبقاش ينفع، ولكن المهم أستفيد دلوقتي بأنى معملش كدة تانى.
جربوا تمسحوا وسيلة التواصل اللى أنتوا مدمنين عليها، فيس بوك بقي أو أنستجرام أو سناب شات او تويتر أو حتى تيك توك.
طب لو انا عندي شغل عليها؟
يبقي تحدد وقت محدد ليها، وتنبه عملائك لدة، وتحاول متتشتتش ومتطلعش برة شغلك ومتلتفتش للتنبيهات والفيديوهات اللتى بتندهلك تفتحها.
لما تاخد فترة تبعد عن السوشيال ميديا هتلاقي نفسك بعد شوية الموضوع بالنسبالك عادي ومش حاجة مهمة.
وسائل التواصل قد تكون مفيدة في حتت ما، ولكن للأسف ضررها في تضييع الوقت، أستفيدوا من فايدتها و أبعدوا عن ضررها.
قولولي هل جربتم أنكم تشيلوا تطبيق أنتوا مدمنين عليه قبل كدة؟
يومكم جميل وسكر، ربي يجعله يوم حلو مليان بركة.
حنين حاتم 
جميل حنين، ربنا يثبتك، أنا مسحته لفترة طويلة ودلوقتي موجود لكن زي قلته الحمدلله كرهته تماماً واستبدلته بوسيلة نافعة بوقت مُقنن 🌷
إعجابإعجاب